HISTORIA YA MKOA WA MANAYARA

Mkoa wa Manyara ulianzishwa kwa tangazo la Serikali Na. 367 lililotolewa tarehe 27 Julai, 2002 na kuchapishwa katika gazeti la Serikali tarehe 2 Agosti, 2002 baada ya kugawanywa kwa Mkoa wa Arusha ambao kabla na wakati wa kipindi cha Uhuru ulijulikana kama Jimbo la Kaskazini (Northern Province). Mkoa wa Arusha ulianza kutumia rasmi jina hilo mwaka 1963.Miongoni mwa Wilaya zilizounda Mkoa huo ni Mbulu na Maasailand ambazo sehemu kubwa  iko katika Mkoa wa Manyara sasa. Wilaya hizo ziligawanywa kama ifuatavyo:- Wilaya ya Mbulu ilianzisha Wilaya ya Hanang mwaka 1969  na Hanang ikianzisha  Babati mwaka 1985, wakati Wilaya ya Maasailand iligawanywa kwenye Wilaya ya Kiteto mwaka 1974 ambayo pia iligawanywa na kuanzisha Wilaya ya Simanjiro mwaka 1993. Aidha, baada ya kugawanywa kwa Mkoa wa Arusha, Wilaya za Mbulu, Hanang’, Babati, Kiteto na Simanjiro ziliuunda Mkoa wa Manyara.

MAENEO YA UTAWALA

Mkoa umegawanyika katika Wilaya tano za kiutawala za Babati, Hanang’, Kiteto, Mbulu na Simanjiro; zote zikiwa na Halmashauri za Wilaya na pia Halmashauri ya Mji wa Babati. Kuna  Majimbo ya Uchaguzi sita na Mamlaka za Serikali za Mitaa  sita; Tarafa 29, Kata 123, Vijiji 393, Vitongoji 1,540 na Mitaa 35. Makao Makuu ya Mkoa yako Mjini Babati.

IDADI YA WATU
Katika Sensa ya Watu na Makazi ya Mwaka 2002 Mkoa ulikuwa na watu 1,040,461 na ongezeko la 3.8% kwa mwaka, mpaka mwaka 2011 Mkoa unakadiriwa kuwa na watu 1,441,771.

WAKAZI WA MKOA

         Makabila Makuu katika Mkoa

WAKAZI WA WILAYA	KUNDI KUU	KUNDI DOGO
BABATI	Wabantu	Wambungwe,Warangi,Wachagga, Wapare, Wangoni,WaAsi
	Nilo Hamites	Wagorowa, Wa-Iraqw, Maasai, Barbaig
HANANG’	Wabantu	Wanyiramba, Warangi, Wanyaturu
	Nilo Hamites	Wabarbaig, Wa-Iraqw.
MBULU	Nilo Hamites	Wa-Iragw, Wabarbaig, Wahadzabe.
KITETO	Wabantu	Wagogo, Warangi, Wanguu, Wakaguru, Wasambaa na Wanguu
	Nilo Hamites	Wamaasai, Waburunge, Wa-Akea (Wandorobo)
SIMANJIRO	Wabantu	Wanguu, Wachagga, Wapare, Warangi
	Nilo Hamites	Wamaasai na Wandorobo[ Wa-Akea ]

NB: Kwa sasa kuna makabila mengine madogo madogo. Aidha makabila ya Hadzabe na Akea yanahitaji uangalizi kwa vile huishi kwa kutegemea uwindaji, mizizi, matunda na kula asali.

MIPAKA YA MKOA                                            
Mkoa umepakana na Mikoa ya Arusha Upande wa Kaskazini, Kilimanjaro na Tanga Upande wa Mashariki, Dodoma Upande wa Kusini, Singida na Shinyanga upande wa Magharibi.

MGAWANYIKO WA ENEO LA MKOA KWA MATUMIZI MBALIMBALI

Mkoa una eneo la kilometa za mraba 50,921, zikiwemo kilometa za mraba 49,661 za nchi kavu na kilometa za mraba 1,260 zilizofunikwa na maji.  Eneo la nchi kavu la Mkoa limegawanyika kama ilivyooneshwa katika jedwali lifuatalo:

Maeneo ya Utawala na Idadi ya watu

Wilaya /Mji	Eneo Km2	Tar-afa	Kata	Vijiji	Vitongoji	Mitaa	Idadi ya Watu, 2011	Uwiano wa Watu kwa eneo (Density)
Babati Mji	461	2	8	13	54	35	*423,380	69.8
Babati	5,608	4	21	95	273	0
Hanang’	3,814	5	25	65	286	0	285,316	74.8
Kiteto	16,645	7	19	58	210	0	206,715	12.4
Mbulu	4,452	5	32	110	475	0	330,784	74.3
Simanjiro	19,941	6	18	52	242	0	195,576	9.8
Jumla	50,921	29	123	393	1,540	35	1,441,771	28.3

* Idadi ya Watu inajumuisha Halmashauri ya Mji wa Babati na Wilaya ya Babati

  

HALI YA HEWA YA MKOA

Mkoa unapata wastani wa Mvua kati ya mm 450 na mm1200 kwa mwaka. Kuna misimu miwili ya mvua. Mvua za muda mfupi ambazo hunyesha kati ya Oktoba na Desemba katika baadhi ya maeneo ya Wilaya za Kiteto, Hanang’, Babati na Mbulu. Mvua za muda mrefu hunyesha kati ya mwezi Februari na Juni. Hali ya hewa ni nyuzi joto 130C wakati wa masika na nyuzi 330C wakati wa kiangazi kutegemeana na msimu na mwinuko wa ardhi. Mkoa upo katika mwinuko kati ya mita 1000 – 2000 juu ya usawa wa bahari