NA MOHAMED HAMAD MANYARA.
NIMPONGEZE Mkuu wa mkoa wa manyara Alexander Mnyeti,
kwa kuonyesha msimamo wake katika kuwatumikia wananchi katika mkoa huo kwa uadilifu
na kuwataka kila mmoja awajibike katika nafasi yake.
Maagizo haya ni ya kiutendaji zaidi na yanayoendana
na kasi ya Rais Dr. John Pombe Magufuli, ambaye kila mara ameonekana kutanguliza
maslahi ya umma mbele.
Alexander Mnyeti ni Mkuu mpya wa Manyara,
aliyeteuliwa miezi miwili iliyopita, akitokea Wilaya ya Arumeru mkoani Arusha
akiwa kama mkuu wa Wilaya, na huu ni mkoa wake wa kwanza kuongoza.
Kwa hali isiyofichika mkoa wa Manyara una changamoto
nyingi za kimaendeleo zinazosababishwa na baadhi ya viongozi wa Kiserikali na Kisiasa,
kuvutana kutaka kuonyeshana umwamba huku wananchi wakitaabika.
Hali hii imewachelewesha wananchi kimaendeleo na
kufanya kulalamika kila kukicha wanapokutana na viongozi wa ngazi za juu huku wakiahidiwa
kutatuliwa kero zao miaka nenda miaka rudi bila mafanikio ya kudumu.
Akiwa ziarani Kiteto mkoani humo Mkuu huyo wa mkoa wa
Manyara, ameonyesha uwezo wake wa kupokea changamoto za wananchi na kuzitafutia
majibu ya haraka jambo ambalo limewapa faraja wananchi waliokuwa wameanza
kukata tama kuwa hahawezi kusaidika.
Mkuu huyo wa mkoa mbali na ukaguzi alioufanya katika
miradi ya maendeleo ujenzi na kutoa maelekezo ya Serikali, pia amefanya
mikutano mitano ya wananchi katika maeneo tofauti wilayani humo.
Mikutano hiyo ilitawaliwa na malalamiko yaliyohusu
migogoro ya ardhi kwa zaidi ya 75% huku huduma za elimu, afya, maji na miundombinu ya barabara ikipata asilimia
zilizobakia katika kulalamikiwa.
Hali hii imempa ujasiri mkubwa Mkuu huyo wa mkoa
kuchukua hatua kwa baadhi ya watumishi wa Serikali na kupendekeza njia bora kwa
watumishi wengine waliobaki katika kuwatumikia vyema wananchi.
Pia aliwakemea baadhi ya wanasiasa aliowaita chanzo
cha migogoro hiyo na kumwagiza mkuu wa Wilaya ya Kiteto Tumaini Magesa kuwakamata
itakapobainika kuhatarisha amani ili hatua za sheria zifuate.
Kuhusu watumishi wa Serikali aliwaambia kuwa kama kuna
mtumishi yoyote hatoweza kuendana na kasi ya Serikali ya awamu ya tano atoe
nafasi kabla hajafikiwa na maamuzi mazito huku akiwaasa kuwa mwananchi ndio
mwajiri wao.
Ziara hiyo ilitawaliwa na maagizo ambapo Mkuu wa
Wilaya ya Kiteto Tumaini Magesa, Mkurugenzi Mtendaji wa halmashauri ya Wilaya
Tamimu Kambona na Mkuu wa Polisi Kiteto Fadhili Luoga kuwa wakitekeleza wajibu
wao wananchi watabaki salama.
Maagizo hayo yalienda sambamba na muda wa
utekelezaji wake ambapo kila walipopewa walikubaliana muda wa utekelezaji jambo
ambalo limedaiwa kuwa halijapata kutokea kwa viongozi wa siku za hivi karibuni.
Mkuu huyo wa Mkoa alimaliza ziara yake akiahidi
kurejea baada ya miezi minne wilayani humo kutaka kuona utekelezaji wake huku
akiapa kuwa yeye sio Mkuu wa mkoa wa maboksi ambayo mvua ikinyesha yatalowana.
Nimalizie kwa kusema nawatakiwa utekelezaji wa
maagizo mema viongozi wa Kiteto na Mkoa wa Manyara kwa ujumla yaliyotolewa na mkuu
wa mkoa wa Manyara Alexander Mnyeti na kwa wale wengine nao wajipime kama
wanaweza kuendana na kasi yake..
Mwisho.
Maoni
Chapisha Maoni